پێشمه‌رگه سپۆرت - میران محه‌مه‌د
له نێو هۆڵی هۆتێل پلازا له شاری صه‌لاله‌ی ولاَتی عه‌مان یارییه‌كانی پاڵه‌وانێتی شه‌تڕه‌نجی یانه پاڵه‌وانه‌كانی ولاَتانی عه‌ره‌بی به‌رده‌وامه و له‌و چوارچێوه‌یه‌شدا و له دووه‌م ڕۆژی ڕكابه‌رییه‌كانی جه‌وله‌كانی دووه‌م و سێهه‌می یارییه‌كان ئه‌نجام دران .
له یه‌كه‌م یاری ئه‌و ڕۆژه كه سه‌رله‌به‌یانی ڕۆژی شه‌ممه 5 ی 10 ی 2024 به‌ڕێوه چوو كوڕه بیرمه‌نده پێشمه‌رگه‌كان به ئاستێكی بالاَ له‌به‌رامبه‌ر یانه‌ی سوهامی یه‌مه‌نی بینران و به ئه‌نجامی 4 - 0 بردنه‌وه‌یان به‌ده‌ست هێنا .
ئه‌مه‌و له هه‌مان ڕۆژ و سه‌ر له ئێواره‌كه‌ی دا ، پێشمه‌رگه‌كان له‌به‌رامبه‌ر شاریقه‌ی ئیمارات یاریان كردوو له‌و یارییه‌دا و دوای ڕكابه‌رییه‌كی به‌هێز دووباره توانیان ، پێشمه‌رگه ئاسا سه‌ركه‌وتووبن به ئه‌نجامی 2 نیو خاڵ به‌رامبه‌ر به 1 و نیو خاڵ .
سه‌باره‌ت به‌و سه‌ركه‌وتنه‌یان له شاری صه‌لاله‌ی عه‌مانه‌وه ئه‌سعه‌د ئیسماعیل سه‌رپه‌رشتیاری گشتی تیمی شه‌تڕه‌نجی یانه‌ی پێشمه‌رگه بۆ پێشمه‌رگه سپۆرت ووتی ، هه‌نگاو بۆ سه‌ركه‌وتن و نازناو ده‌نێین و ئاستی بیرمه‌ندانمان شێر ئاسا بوون و پاڵه‌وان بوون كه خۆش به‌ختانه له سێ یاریمان توانیمان سه‌ركه‌وتن به‌ده‌ست بهێنین .
هه‌روه‌ك ئاماژه‌ی پێدا كه ئێمه وه‌ك پێشمه‌رگه ده‌جه‌نگین و جه‌نگاوه‌رانیشمان پیشه‌گه‌رانه یاری ده‌كه‌ن بۆ سه‌ركه‌وتنه‌كان و نازناوه‌كان .