پێشمه‌رگه سپۆرت - میران محه‌مه‌د
له نێو هۆڵی هۆتیل پلازا له شاری صه‌لاله‌ی سه‌ڵته‌نه‌ی عه‌مان ڕكابه‌رییه‌كانی پاڵه‌وانێتی شه‌تڕه‌نجی یانه پاڵه‌وانه‌كانی ولاَتانی عه‌ره‌بی به‌رده‌وامه و تێیداو له جه‌وله‌ی شه‌شه‌م و پێش كۆتایی ئه‌و پاڵه‌وانێتیه و له یارییه‌كی به‌هێزدا بیرمه‌ندانی پێشمه‌رگه ڕوبه‌ڕوی تیمی شه‌تڕه‌نجی یانه‌ی صه‌لاله‌ی خاوه‌ن شار و ولاَتی میوانداری پاڵه‌وانێتیه‌كه بونه‌وه .
له‌و یارییه‌دا و له‌سه‌ره‌تاوه یاریزانه ئاست به‌رزه‌كانی پێشمه‌رگه توانیان كۆنترۆڵی چركه‌ی كاتژمێری یارییه‌كانیان بكه‌ن و به ئه‌نجامی 4-0 خاڵ سه‌ركه‌وتنیان به‌ده‌ست هێنا .
ئه‌مه‌و به‌و بردنه‌وه به نرخه ئاڵتونییه‌یان پێَشمه‌رگه‌كانی نوێنه‌ری خاك و نیشتیمان توانیان نازناوی پاڵه‌وانێتیه‌كه به‌ده‌ست بهێنن كه 10 یانه تێیدا ڕكابه‌ر بوون .
سه‌باره‌ت به‌و ئه‌نجام و نازناوه‌یان ئه‌سعه‌د ئیسماعیل سه‌رپه‌رشتیاری گشتی تیمی شه‌تڕه‌نجی یانه‌ی پێشمه‌رگه بۆ پێشمه‌رگه سپۆرت ووتی ، بردنه‌وه‌مان له‌و یارییه‌دا كردینه خاوه‌ن نازناو و جام و میدالیا ئاڵتونییه‌كان .
هه‌روه‌ك ووتیشی له شاری صه‌لاله‌ی عه‌مانه‌وه پیرۆزبایی له خۆمان و ته‌واوی ئه‌ندامانی ده‌سته‌ی كارگێڕی یانه‌كه‌مان و سه‌رجه‌م هانده‌رانمان ده‌كه‌م بۆ بردنه‌وه‌ی نازناوێكی عه‌ره‌بی كه 10 یانه‌ی ئاست به‌رز تێیدا ڕكابه‌ر بوون .
داوجار ئه‌سعه‌د ئاماژه‌ی به‌وه‌شكرد كه له ڕۆژی چوار شه‌ممه به‌رواری 9 ی 10 ی 2024 و له كاتژمێر 9:00 ی سه‌ر له به‌یانی دوا یاریان له‌به‌رامبه‌ر یانه‌ی جه‌معییه‌ی فه‌ڵه‌ستین ئه‌نجام ده‌ده‌ن و ئه‌نجامی ئه‌و یاریه‌شیان كاریگه‌ری له‌سه‌ر ڕیزبه‌ندی كۆتاییان نابێت كه توانیویانه تێیدا میدالیای ئاڵتون و جامی یه‌كه‌می ببه‌نه‌وه .