وسام محه‌مه‌د ، یاریزانانمان هیوان بۆ دوا ڕۆژی‌ هه‌ڵبژارده‌ی‌ عێراق


پێشمه‌رگه‌ سپۆرت - میران محه‌مه‌د

دوای‌ بانگێشت كردنیان بۆ به‌شداری‌ له‌ یه‌كه‌م تاقیكردنه‌وه‌ و دیاریكردنیان بۆ ڕیزی‌ هه‌ڵبژارده‌ی‌ تازه‌پێگه‌یشتوانی‌ تۆپی‌ پێی‌ عێراق ، پاش نیوه‌ڕۆی‌ ، ڕۆژی‌ هه‌ینی‌ 28 ی‌ شوباتی‌ 2025 و له‌ شاری‌ به‌غداد و به‌ ئاماده‌بوونی‌ وسام محه‌مه‌د لابازگ سه‌رپه‌رشتیاری‌ گشتی‌ تیمه‌كانی‌ تۆپی‌ پێی‌ یانه‌ی‌ وه‌رزشی‌ پێشمه‌رگه‌ تاقیكردنه‌وه‌ی‌ یه‌كه‌م بۆ یاریزانانی‌ یانه‌كانی‌ عێراق بۆ خوار ته‌مه‌ن 16 ساڵ ئه‌نجام درا .

له‌و تاقیكردنه‌وه‌یه‌دا كه‌ له‌ ژێر چاودێری‌ و سه‌رپه‌رشتی‌ چوار ڕاهێنه‌ری‌ ئیسپانی‌ و دوو ڕاهێنه‌ری‌ عێراقی‌ به‌ڕێوه‌ چوو ، یاریزانان بۆ ماوه‌ی‌ 50 خوله‌ك به‌شداریان له‌ یاری‌ هه‌ڵسه‌نگاندن كرد كه‌ به‌ شێوه‌ی‌ ( ڤیدۆ ) یاریه‌كه‌ تۆمار كرا تا دواتر بڕیار له‌ باشترینه‌كان بدرێت و بانگێشتی‌ ڕیزی‌ هه‌ڵبژارده‌ی‌ عێراق بكرێن .

سه‌باره‌ت به‌ تاقیكردنه‌وه‌ی‌ یاریزانان و به‌شداری‌ ژماره‌یه‌كی‌ به‌رچاو له‌ یاریزانانی‌ یانه‌كه‌یان ، وسام محه‌مه‌د بازگ سه‌رپه‌رشتیاری‌ تیمی‌ تۆپی‌ پێی‌ یانه‌ی‌ پێشمه‌رگه‌ ووتی‌ ، خۆشحاڵین كه‌ یاریزانانمان گه‌یشتونه‌ته‌ ئه‌و ئاسته‌ چاوی‌ ڕاهێنه‌رانی‌ هه‌ڵبژارده‌ی‌ عێراق یان له‌سه‌ر بێت و هیواداریشین له‌ پاش هه‌ڵسه‌نگاندن زۆرترین یاریزانانمان بگه‌نه‌ ڕیزی‌ هه‌ڵبژارده‌ی‌ عێراق .

وسام ئاماژه‌ی‌ به‌وه‌شدا كه‌ هه‌ڵسه‌نگاندنه‌كان ته‌واو جیاواز بوون و ده‌سته‌ی‌ ڕاهێنه‌رانی‌ لالیگای‌ ئیسپانی‌ كه‌ سه‌رپه‌رشتی‌ هه‌ڵبژارده‌كانی‌ عێراق ده‌كه‌ن هه‌ڵسه‌نگاندنه‌كان به‌ڕێوه‌ده‌به‌ن .

هه‌روه‌ك ناوبراو ئاماژه‌ی‌ پێكرد كه‌ له‌ پاش پێداچونه‌وه‌ و بینی‌ نه‌وه‌ی‌ یارییه‌كان ، باشترینه‌كان له‌ ڕێگه‌ی‌ یانه‌كانه‌وه‌ بانگێشت ده‌كرین بۆ ڕیزی‌ هه‌ڵبژارده‌ی‌ عێراق .

دواجار بازگ سوپاسی‌ ڕاهێنه‌رانی‌ یانه‌ی‌ پێشمه‌رگه‌ی‌ كرد كه‌ هاوكار و هه‌ماهه‌نگ بوون و پاڵپشتی‌ یاریزانانیان كردووه‌ و له‌ گه‌شته‌كه‌ هاوشانیان بوون .



PM:09:35:01/03/2025




ئه‌م بابه‌ته 180 جار خوێنراوه‌ته‌وه‌‌