پێشمه‌رگه سپۆرت - میران محه‌مه‌د
له نێو هۆڵی داخراوی شه‌هیدی ئه‌ندازیار ئه‌حمه‌دی تایبه‌ت به یانه‌ی وه‌رزشی پێشمه‌رگه چالاكییه وه‌رزشییه‌كان به‌رده‌وامه ئه‌وه‌ش به پاڵپشتی یه به‌رده‌وامه‌كانی سه‌رۆك و جێگری سه‌رۆك و سكرتێر و ئه‌ندامانی ده‌سته‌ی كارگێڕی یانه كه ئه‌و هۆڵه بۆته داینه‌مۆی بره‌و دان و به‌ره‌و پێشچوونی وه‌رزش و پێگه‌یاندنی چه‌ندین یاریزان له یارییه‌كانی ( باله ، باسكه ، تێنس ، كاراتێ و هتد .... ) .
ئه‌مه‌و له درێژه‌ی ئاماده‌كارییه‌كانی تیمی باسكه‌ی یانه‌ی پێشمه‌رگه له‌سه‌ر ئاستی تازه‌پێگه‌یشتوانی كوڕان ، ئه‌و تیمه میوانداریان له تیمی باسكه‌ی تازه‌پێگه‌یشتوانی ژیما بۆ په‌ره‌پێدانی یاری باسكه له شاری سلێمانی كرد .
له‌و یارییه دۆستانه‌یه‌دا كه له كاتژمێر 5:00 ی ئێواره‌ی ڕۆژی پێنج شه‌ممه به‌رواری 19 ی 12 ی 2024 به‌ڕێوه چوو تێیداو دوای پیشان دانی ئاستێكی به‌رزی هونه‌ری دواجار تازه‌پێگه‌یشتوانی باسكه‌ی یانه‌ی پێشمه‌رگه توانیان به ئه‌نجامی 84 - 21 سكۆر بردنه‌وه به‌ده‌ست بهێنن .
سه‌باره‌ت به ئاماده‌كارییه‌كانی تیمی باسكه‌ی یانه‌ی پێشمه‌رگه كامه‌ران محه‌مه‌د ڕاهێنه‌ری تیمه‌كه بۆ پێشمه‌رگه سپۆرت ووتی ، به سوپاسه‌وه هاوكارییه به‌رده‌وامه‌كانی جێگری سه‌رۆكی یانه پێگه‌یه‌كی گرنگی بۆ یاری باسكه جێهێشتووه كه نه‌وه له دوای نه‌وه چه‌ندان یاریزانمان له نێو هۆڵی یانه‌ی پێشمه‌رگه په‌روه‌رده كردووه و توانیومانه له‌سه‌ر ئاستی ته‌مه‌نه‌كان یاریزانی ئاست به‌رز بگه‌یه‌نینه ڕیزی هه‌ڵبژارده‌ی باسكه‌ی عێراق بۆ ئاستی لاوان ، هه‌روه‌ك كامه‌ران ئاماژه‌ی پێكرد كه ئه‌نجام دانی یاری دۆستانه و به‌شداریكردن له خول و پاڵه‌وانێتیه‌كان گرنگی بۆ ئاستی یاریزان ده‌بێت و ده‌بێته هۆكار بۆ ده‌ركه‌وتنی توانای به‌هره‌مه‌ندانی نوێ .
سه‌باره‌ت به تیمی باسكه‌ی تازه‌پێگه‌یشتوانی یانه‌كه‌یان ئه‌و ڕاهێنه‌ره به ئه‌زموونه ووتی ، ئه‌م یاریه‌مان بۆ ته‌مه‌نه‌كانی 2009 - 2010 ڕێك خستبوو كه به سوپاسه‌وه تیمی ژیما و به‌ڕێز دكتۆر ڕزگار به ڕۆحێكی وه‌رزشییه‌وه دێنه نێو چالاكییه‌كان و یارییه دۆستانه‌كان هه‌ربۆیه له‌م پێگه ئه‌له‌كترۆنییه‌ی یانه‌كه‌مانه‌وه سوپاسیان ئاراسته ده‌كه‌ین .
جێگه‌ی باسكه تیمی باسكه‌ی یانه‌ی پێشمه‌رگه له ساڵی 1999 دروست بووه و تا ئه‌مڕۆ ئه‌و تیمه و فێرگه‌كانی بۆته كۆكه‌ره‌وه‌ی چه‌ندان پاڵه‌وانی یارییه‌كه كه تێیدا چه‌ندین یاریزانی له هه‌ڵبژارده‌ی باسكه‌ی پێشكه‌وتوانی عێراق و لاوانی خۆی بینیوه‌ته‌وه .