له‌گه‌ڵ ده‌ستپێكی مانگی ڕه‌مه‌زان، ئه‌و كه‌سانه‌ی‌ توشبووی نه‌خۆشی درێژخایه‌نن پرسیاری زۆریان هه‌یه‌ له‌باره‌ی‌ چۆنیه‌تی وه‌رگرتنی ده‌رمانه‌كانیان له‌م مانگه‌دا بۆ ئه‌وه‌ی‌ كه‌مترین كاریگه‌ری لاوه‌كی له‌سه‌ریان ده‌ربكه‌وێت و بتوانن له‌م مانگه‌دا به‌ڕۆژوو ببن.

دكتۆر ئه‌حمه‌د وه‌ك پزیشكی نه‌خۆشییه‌كانی دڵ و ملوله‌كانی خوێن، ڕێنمایی توشبووان به‌م دوو نه‌خۆشییه‌ ده‌كات ده‌رمانه‌كانیان ڕێكبخه‌ن له‌ مانگی ڕه‌مه‌زاندا چونكه‌ ته‌نها ئه‌م ڕێگایه‌ هه‌یه‌ یارمه‌تیده‌ریان بێت بۆ ئه‌وه‌ی‌ به‌شێوه‌یه‌كی ته‌ندروست به‌ڕۆژوو ببن، به‌ڵام ئه‌م بابه‌ته‌ ئه‌و كه‌سانه‌ ناگرێته‌وه‌ كه‌ كاتی نێوان ده‌رمانه‌كانی كه‌مه‌.

سه‌باره‌ت به‌ توشبووان به‌ نه‌خۆشی شه‌كره‌ به‌ هه‌مان شێوه‌ به‌گوێره‌ی‌ ئاستی نه‌خۆشییه‌كه‌یان ده‌توانن له‌گه‌ڵ پزیشكی پسپۆڕ قسه‌ بكه‌ن بۆ ئه‌وه‌ی‌ كاتی ده‌رمانه‌كانیان ڕێكبخات، له‌گه‌ڵ ئه‌وه‌شدا ژه‌می سووك بخۆن وه‌ك سه‌وزه‌ و زیاده‌ ڕه‌وی له‌ خواردنی شیرینی نه‌كه‌ن و سیستمێكی خۆراكی ته‌ندروست په‌یڕه‌و بكه‌ن بۆ ئه‌وه‌ی‌ شه‌كره‌كه‌یان به‌رز نه‌بێته‌وه‌. 

ئه‌و كه‌سانه‌ش كه‌ ده‌رمانی به‌رزه‌ په‌ستانی خوێن به‌كارده‌هێنن باشتره‌ یه‌كه‌م ژه‌می ده‌رمانه‌كه‌یان پاش به‌ربانگ كردنه‌وه‌ وه‌ربگرن، دوور بكه‌ونه‌وه‌ له‌ گوشاری ده‌روونی و توڕه‌ بوون و سیستمی خۆراكی ته‌ندروستیان هه‌بێت هاوشێوه‌ی‌ توشبووانی شه‌كره‌ و ده‌بێت خۆیان له‌ خواردنی سوێر دوور بخه‌نه‌وه‌.