پێشمه‌رگه سپۆرت - میران محه‌مه‌د
لیژنه‌ی پێشبڕكێكان له یه‌كێتی ناوه‌ندی تۆپی پێی عێراق واده‌ی ده‌ست پێكی یارییه‌كانی خولی نایابی یانه‌كانی عێراقی ئاشكرا كردوو بڕیاری دا له به‌رواری 11 ی 10 ی 2024 یارییه‌كانی ئه‌و خوله ده‌ست پێبكات .
ئه‌مه‌و لیژنه‌ی ناوبراو بڕیاری داوه یارییه‌كانی خوله‌كه له واده‌ی ده‌ست پێكی تا پێش 20 ی حوزه‌یرانی 2025 یارییه‌كانی به كۆتا بێن كه 20 یانه تێیدا ڕكابه‌ری ده‌كه‌ن و به یه‌ك كۆمه‌ڵه یاریه‌كانیان ئه‌نجام ده‌ده‌ن ، هه‌روه‌ك لیژنه‌كه جه‌ختی له‌وه كردۆته‌وه كه ئه‌و بڕیارانه‌ی له كۆبونه‌وه‌ی هونه‌ری دراون وه‌ك خۆی جێبه‌جێ ده‌كرێن .
جێگه‌ی وه‌بیر هێنانه‌وه‌یه له كۆبونه‌وه هونه‌رییه‌كه‌ی یه‌كێتی ناوه‌ندی تۆپی پێی عێراق كه سه‌رۆكی یه‌كێتییه‌كه ئاماده‌ی بوو بڕیار دراوه بۆ هه‌ر تیمێك 25 یاریزان تۆمار ده‌كرێت و پێنج یاریزانی سه‌ربه‌ستیش له ته‌مه‌نه‌كانی خوار 21 ، 19 و 17 ساڵ ده‌توانن یاری بكه‌ن ئه‌مه‌و جیاواز له وه‌رزه‌كانی ڕابردوو چاوه‌ڕوان ده‌كرێت له خولی ئه‌مساڵدا سستمی ته‌كنیكی ڤار له یارییه‌كان وه‌ك یاریده‌ده‌ری ناوبژیوان كاری له‌سه‌ر بكرێت .