ئاراس رواندزی -
ئاشکرایە هەر چوار ساڵ جارێک پاڵاوتنی هەڵبژاردەکان بۆ گەیشتن بە مۆندیال ئەنجامدەدرێت، وڵاتەکان لە تەواوی کیشوەرەکان لە پێناو گەیشتن بەو خەونە دەجەنگن، بەهۆی زیادکردنی ژمارەی بەشداربووانیش بۆ چل و شەش، ئەمجارە زۆرترین چانس بۆ ئەو هەڵبژاردانە رەخساوە کە لە پێشوودا نەیانتوانیە ئاڵاکەیان لەو بۆنە وەرزشیە گەورەیە بەرز بکەنەوە .
دیارە من لێرەدا نامەوێ شەن و کەوی دۆخی تیپە وێرانەکەی عیراق لەو پاڵاوتنە بکەم، نە بردنەوەو نە دۆڕانیشی لای من گرنگ نیە، چونکە لە بنەڕەتدا هیچ شتێک من بە عیراق و هەڵبژاردەکەیەوە نابەستێتەوە! رەنگە ئێستا کەسانێک بڵێن ئەی بەچی گەشت دەکەی؟! بێگومان بە پاسپۆڕتی عیراقی، بەڵام ئەو کارە ناچاری و سەپێندراوە، نەک من بە رەزامەندی و ئارەزووی خۆم هەڵمبژاردبێ، ئەوانەی گەشتی دەرەوەشیان کردووە دەزانن پاسپۆڕتی عیراقی شانازی نیە، بگرە مایەی شەرمه بۆ بەکارهێنەرانی !
لێرەدا من نامەوێ بە وشەی زیاتر خۆم بە بابەتی عیراق سەرقاڵ بکەم، چونکە گەرەکمە باس لە ئەگەرەکانی پشکداریکردنی هەڵبژاردەی کوردستان لە مۆندیالەکانی داهاتوو بکەم، بەڵام چۆن و کەی ؟
هەموومان دەزانین بەهۆی داگیرکاری و بێبەشکردنمان لە دەوڵەتێکی سەربەخۆی دانپێدانراو، کوردستان ناتوانێ بەشداری ئەو پاڵەوانێتیانە بکات کە لەلایەن فیفاوە بە فەرمی ناسێندراون، بۆیە کاتێ سەیری یاری هەر هەڵبژاردەیەک دەکەم، خەمۆکی و بێتاقەتی زۆر دامدەگرێت، بە تایبەتی ئەو کاتەی هاندەران ئاڵای وڵاتەکانیان بەرزدەکەنەوە! ئای قەدەر ئێمە لە چ هەستێکی خۆش بێبەشکراوین، چ هەستێکی ئەفسووناویە کاتێک بۆ پشتیوانی وڵاتەکەت و لە بەردەمی میدیاو هەموو جیهان ئاڵای وڵاتەکەت دەشەکێنیەوە، ئاخر بۆ دەبێ گەلێکی حەفتا ملیۆنی لەو ماف و خەونە گەورەیە بێبەش بکرێت ؟!
نایشارمەوە من بڕوای تەواوم بە سەربەخۆیی و گەیشتن بەو ئاواتە هەیە، دڵنیام لە داهاتووێکی نزیکدا ئەو خەونە دێتە دی، نەک هەر ئەوە، بگرە کوردستانیشمان دەگاتە مۆندیال !
بێگومان قورسە لە ئێستادا وێنەی ئەو دوو رووداوە گەورەیە لە هزرتدا بچەقێنێ، رەنگە زۆر کەس گاڵتەشم پێبکات، بەڵام بیرتان دێنمەوە کە ئەو نیمچە سەربەخۆییەی ئێستای باشووریش رۆژانێک لای باوک و باپیرانمان خەون بوو، لێ بە خوێن و قوربانیدان هاتەدی، بۆیە لای من هیچ شتیک مەحاڵ نیە .
بەهۆی پیشەکەم و زانیاری زۆرم لەسەر یاریزانانی تاراوگە، دەتوانم بڵێم ئێمەی کورد دوای قۆناغی سەربەخۆیی گەر دڵسۆزی و لێهاتوویی بکەینە پێوەری کارو خزمەت، دەتوانین زۆر بە ئاسانی هەڵبژاردەیەکی بەهێز بنیات بنێین، دەیان لاوی بەهرەدارو درەوشاوەمان لە خولەکانی وڵاتانی ئەوروپا هەیە کە بەداخەوە بەشێکیان ئێستا خزمەت بە هەڵبژاردەکانی وڵاتانی داگیرکەر دەکەن! بە کۆکردنەوەی ئەو ستارانەو سپاردنیان بەراهێنەرێکی بە ئەزموون، دەتوانین دوای چەند ساڵێک رکابەرایەتی بەهێزەکانی ئاسیا بکەین و بگرە بلیتێکی مۆندیالیش بەدەست بهێنین، گەر خوای گەورە زیاتر تەمەنمان پێبدات، بەپێی لۆژیکی لێکدانەوەکانم لە پاڵاوتنەکانی مۆندیالی (٢٠٣٤) کوردستان یەکێک لە هەڵبژاردە بەشداربووەکان دەبێت، ئەوسا بە سروودی ئەی ڕەقیب هەر ماوە قەومی کورد زوبان، گوێی دوژمنانمان کەڕ دەکەین، بە بەرزکردنەوەی پەرچەمە پیرۆزەکەشمان پەیام بە هەموو گەلانی جیهان دەدەین و پێیان دەڵێین زیندووە قەت نانوێ ئاڵاکەمان .
وتارەکان تەنها بیروبۆچوونی خاوەنێتی