ئەمساڵ لە پریمەرلیگی عیراق جەماوەری یانە کوردستانیەکان یەکەمی بێ رکابەرن، هەفتانە تیفۆو نمایشی سەردەمیانەو جۆش و خڕۆشی هاندەران دەبێتە ترێندو میدیای عیراقی و عەرەبیش سەرسامی خۆیان لەبارەیەوە نیشاندەدەن و زۆرترین قسەو باسی لەسەر دەکەن، لێ هەر کاتێک دوو تیپی کوردستانی رووبەڕووی یەکتر دەبنەوە، دیمەنەکان تەواو پێچەوانە دەبنەوەو نەخشێکی قێزەون دەخرێتە سەر ئەو تابلۆ جوانەی کە هەموومان شانازی پێوە دەکەین. 

یارییەکەی دهۆک و زاخۆ دواترین و دیارترین نموونەی ناشارستانی و یەکتر قەبوڵنەکردنی هاندەرانی هەردوولایە، راستی پێم سەیرە بۆچی زۆرینەی ئەو یارییانەی لە نێوان تیپە کوردستانیەکان ئەنجامدەدرێت، کۆتاییەکەی تراژیدی و پڕ لە شەڕو ئاژاوەیە؟! ئاخر بۆ دەبێ لە جیاتی دروشمی وەرزشی و برایانە، قسەی زبرو زامدارکەر بگوترێتەوە؟! باشە بۆ دۆخەکە لە گۆڕینەوەی گوڵەوە بۆ شەڕە کورسی دەگۆڕێ؟! ئایا دەستێکی تێکدەرانە لە پشت ئەم رووداوانە هەیە، یاخود لاوازی ئاستی رۆشنبیری جەماوەرە ئەو رووداوانە دەخوڵقێنێ؟! هەرچی دەستەکانی بەناو هاندەرانیشە، لە جیاتی هوشیارکردنەوەو پشتیوانیکردنی یاریزانان بە دروشمی وەرزشی و سەردەمیانە، بوونەتە فاکتەرێک بۆ سەرهەڵدانی کێشەو گرژیەکان! بۆیە پێویستە لێپێچینەوەیان لەگەڵدا بکرێ. 

ئاشکرایە دوژمنانی کورد هەمیشە لە سەنگەردان و بە هەموو توانایەک لە هەوڵدان بۆ ئەوەی تۆی ڕق و ناتەبایی لە نێوان شارەکان و پێکهاتە جیاوازەکانی کوردستان بچێنن و لە یەکترمان جیا بکەنەوە، کەچی ئێمە لە جیاتی بە بەرەنگاربوونەوەو پوچەڵکردنەوەی ئامانجەکەیان، نەزانانە ئاو دەکەینە ئاشی دوژمن و خۆمان ئاواتە گڵاوەکەیان بەدی دێنین! 

لێرەدا من بە باشی دەزانم تا ئەو ساتەی مەترسیەکان دەڕوێنەوەو ئاستی رۆشنبیری هاندەرانیش زیاتر بەرز دەبێتەوە، جەماوەری هیچ یانەیەک سەردانی یاریگای بەرامبەر نەکەن، چونکە دۆخەکە بە ئەندازەیەک گرژ بووە، خەریکە ئارامی و ئاسایش و پەیوەندی کۆمەڵایەتیشمان دەکەوێتە مەترسیەوە! کردارو پەرچەکرداری ناتەندروستی ئەم چەند رۆژەی دهۆکی و زاخۆییەکان قەبارەی ئەو مەترسیەیان بۆ دەرخستووین، بۆیە پێویستە لە ئاستی باڵاوە هەنگاو بۆ چارەسەری ئەو گرژیانە بنرێت و رێگە نەدرێ دۆخەکە لە کۆنتڕۆڵ دەرچێ، چونکە تەشەنەسەندنی ئەو ئاگرە ئێجگار مەترسیدارە، هاوکات لەگەڵ پێویستی رۆڵی نیشتیمانیانە و بەرپرسیارانەی میدیا وەک ئامرازێک بۆ هێورکردنەوە، زۆر گرنگە هۆشمەندان و خەڵکی کوردپەروەری بادینانیش بێنە دەنگ و رێگە نەدەن بەهیچ هۆکارێک برایەتی و خزمایەتی و هاوسەنگەری دهۆک و زاخۆ تێکبچێت.